BAGUIO CITY– Kidkiddawen dagiti opisyales ti Barangay Lourdes Extension iti siudad ti Baguio ti epektibo a panakitinnulong dagiti residente iti panakaipatungpal dagiti paglintegan kontra iti COVID-19.
Kasaruno daytoy ti agtultuloy a panagngato ti kaso ti virus iti nasao a barangay partikular ti Purok Lagoon nga agtaltaltalinaed a naka-lockdown.
Inaklon iti Bombo Radyo ni Kapitan Jeffrey Timango a nakapoy ti kooperasyon dagiti umili kadagiti otoridad nangruna ti panagtungpalda iti physical distancing, umno a panagsuot iti facemask ken face shield ken dadduma pay a minimum health protocols.
Innayonna pay a linibasan dagiti dadduma a residente sadiay ti panakaipatungpalda kuma iti swab test.
Gapu iti daytoy, dinakamatna a dakkel ita a karit kadagiti opisyal ken frontliners ti negatibo a reaksion dagiti residente iti kampanya kontra iti nasao a sakit.
Maipalagip a dumanon itan iti siyam ti positibo a kaso ti COVID-19 iti nasao a barangay no sadino, innem kadagitoy ti matamtaming iti pagagasan a bin-ig a residente ti Purok Lagoon.
Nangipatungpalda metten iti mass testing idi napalabas a lawas kas paset ti nailaylayon a contact tracing dagiti otoridad.
