Naduktalan ti National Bureau of Investigation (NBI) ti maysa a bodega sadiay Bocaue, Bulacan a mapapati nga agur-urnong ken aglaklako manen kadagiti daan ken imported rice a nakabalkot a premium-grade grain.
Ti nagadu nga imported a bagas ket mapapati a naidulin iti agarup dua a tawen agraman dagiti alikamen a maararamat a mangilaok kadagiti barayti ken mangnayon iti artipisial a banglo tapno maipasa dagitoy kas de kalidad a bagas.
Sigun kenni NBI Chief Jaime Santiago, inlaokda ti nagduduma a kita ti bagas tapno agbalin a kas nangina wenno Class-A a bagas.
Para kenkuana, maibilang a hoarding ken delikado ti bagas gaputa saan a nalawag nu natalged pay nga agbalin a taraon dagiti tattao wenno para laeng kadagiti baboy.
Iti agdama, agtultuloy ti imbestigasion ti NBI nu ti bagas ket naala a ligal iti Pilipinas.
Kabayatanna, pinaglibakan met ti kompania ti aniaman a saan a nasayaat nga aramidda.
Impakaamo ni Santiago a makikordinarda iti lokal nga otoridad idiay Bocaue tapno maamuan ti agtagikua ti warehouse ken mangipilda ti kaso a hoarding, adulteration, profiteering, false labeling, ken economic sabotage.
