Naireport ti maysa a dermatologist iti istasyon dagiti kapulisan kalpasan a saanna a pinagan-ano ti demand letter nga inpatulod ti nagbalin a kostumer daytoy seknan iti pannakacompensate ti napasamak kenkuana bayat iti panagpadermana kadakuada.
Sigun iti report dagiti kapulisan, ti complainant ket maysa a babae a businesswoman, agtawen iti 66, ken residente ti Liwanag-Loakan, Baguio City.
Napasamak ti insendente idi pay laeng bulan ti Marso iti agdama a tawen ngem ita laeng a bulan a nagturong ti complainant iti istasyon tapno agreport.
Sigun iti complainant, nadiagnose daytoy iti thermal facial injury ken exogenous ochronosis secondary to Pico Laser procedure babaen iti attending dermatologist daytoy.
Innayonna a dagiti nasao nga injuries ket naalana kalpasan a naipasidung daytoy iti pico laser idi bulan ti Enero babaen iti maysa a laser clinic a masarakan idiay Casa Vallejo Building, Upper Session Road, Baguio City.
Ti nasao a procedure, impatungpal ti maysa kadagiti staff ti nasao a klinika.
Impeksa ti complainant a bayat iti nasao a procedure, nakarikna daytoy iti burning sensation, ot-ot, redness ken visible skin damage.
Apaman a nadiagnose daytoy kadagiti nagduduma nga injuries, dagusna nga impakaammo daytoy iti manager ti nagpadermaanna klinika wenno skin specialist para iti refund ti facial and body treatment ken procedure packages nga in-avail daytoy a dumanon iti agarup P420K.
Nupay kasta, imbes a mairefund ti gastosna, maatap nga in-offeran daytoy ti nasao a clinic iti sabali pay a treatment package nga addan gatad a P50K.Karaman ditoyen ti sangapulo a microneedling sessions.
Gapu ta saan a mapnek ti complainant iti sungbat ti clinic, nagdesisyon daytoy nga ireklamona laengen ti nasao a klinika.
Nangipatulod daytoy iti demand letter babaen iti legal counsel na idi paylaeng Marso ngem agingga ita ket saan a simmungsungbat ti nasao a clinic iti naawatda a surat, rason tapno ireport daytoy ti biktima iti istasyon ti kapulisan. // Bombo Noveh Organo
