Pakdaar: Daytoy a damag ken naglaon iti panangdakamat iti panagkettel iti bukod a biyag. Nailinged dagiti anyaman a pakabigbigan ti biktima para iti privacy daytoy ken kas panangraem iti pamilyana
Pimmusay ti maysa a lalaki nga Grade 12 student nga agtawen iti 18 kalpasan a kinetelna iti bukodna a biyag iti pagnanaedanda iti siudad ti Baguio itay nabiit.
Maibasar iti report ti pulisya, impeksa ti guardian ken makintagikua iti pagnanaedan ti biktima a maysa a babae nga agtawen iti 55 nga imbinglay ti biktima kenkuana ti panggepna nga agsardeng nga agadal ken agawid laengen iti probinsyada gapu ta marigatan daytoyen iti panagadalna.
Iti laksid ti panangguyugoy ti babae iti biktima, saanna a nabaliwan ti desisyon ti biktima nga agsubli iti probinsya da.
Naituding nga agawid ti biktima iti kabigatanna.
Nangala daytoy iti bus ticket para iti biktima paturong iti probinsyana ken insendna babaen iti messenger.
Idi kabigatanna, nagturong ti babae iti kuwarto ti biktima. Gapu ta awan ti sumungsungbat iti panangtuktokna iti ruwangan, pimmanaw daytoy.
Nupay kasta, sumagmamano nga oras ti napalabas, nadiskobre ti helper ti babae ti bagi ti biktima iti terrace dagitoy.
Nagpaarayat ngarud dagitoy iti tulong manipud iti pulisya ken iti Scene of the Crime Operatives (SOCO) tapno ipatungpal ti kaskenan nga eksaminasyon. //via Bombo Noveh Organo
