Maysa a kaso ti panagtakaw iti maysa a grocery a masarakan iti nagbaetan ti Middle Rock Quarry ken Upper Rock Quarry, Baguio City ti naireport iti pulisya itay nabiit.
Ti nasao a grocery ket sakup ti Middle Rock Quarry ngem adda daytoy iti sango ti barangay hall ti Upper Rock Quarry.
Maibasar iti report, dumanon iti nasurok P10,000 ti gatad dagiti naala manipud iti grocery, pakairamanan ti kuarta, gadget ken sumagmamano pay nga produkto.
Sigun kenni Upper Rock Quarry Punong Barangay Joey David, agtultuloy pay laeng ti imbestigasyon maipanggep iti nasao nga insidente.
Maibasar iti naala iti CCTV footage, tallo nga indibidual dagiti suspek- maysa kadakuada ti nagbalin a lookout bayat ti panagtakaw.
Kabayatanna, impasigurado met ni Middle Rock Quarry Barangay Captain Arnold Camongao ti naing-inget a panagpatrolya dagiti opisyales ti barangay iti masakupan da tapno mapagtalinaed ti seguridad dagiti residente.
Nagpallagip met daytoy iti publiko, nangruna kadagiti business owners, a mangikabil kadagiti CCTV cameras iti establisimientoda tapno makatulong daytoy iti panangsalaknib kadagiti negosio ken pannakaammo kadagiti posible a kriminal nga aktibidad. //via Bombo Khey Reparip
