Umap-apela ti maysa a grupo a buklen ti nasurok innem a pulo a private unit owners ken investor ti Camp John Hay, Baguio City iti gobierno a palubosanna ida nga agtalinaed iti unitda ken makikatungtong iti Bases Conversion and Development Authority (BCDA) tapno marisut ti sitwasion.
Iti surat kenni President Ferdinand R. Marcos Jr., a naipatulod babaen kenni Baguio City Mayor Benjamin Magalong, impaganetget ti Camp John Hay Private Owners for Justice nga addada iti “urgent” ken nakaam-amak a kasasaad gapu iti pannakaipatungpal ti writ of execution nga inruar ti Regional Trial Court Branch 6 ti siudad ti Baguio.
Naipaskil payen dagiti “notice” wenno pakaamo kadagiti ruangan dagiti yunitda.
Ti Camp John Hay Private Owners for Justice ket buklen ti nasurok nga innem a pulo a private unit owners ken investors a kas ti The Forest Lodge, The Manor, Forest Estates, Country Homes, Golf Estates, ken Forest Cabins iti Camp John Hay.
Patien ti nasao a grupo a ginatangda ti sanikua nga inlako ti Fil-Estate Management, Camp John Hay Development Corp., wenno dagiti third party a nasapsapa a gimmatang kadagiti sanikua.
Nakalanad pay iti surat nga addaanda ti umno a dokumento, isut rason nga adda ti karbenganda iti sanikua agingga iti tawen 2046.
Nupay kasta, gaputa pinal ken ehekutibo itan ti pangngeddeng ti Korte Suprema, mapilitanda a mangbakante kadagiti sanikua a ginatangda.
Sigun iti nasao a grupo, ti agdama a kasasaadda ket nagtaud iti nabayagen a ligal a panagsusupiat ti BCDA ken Camp John Hay Development Corporation (CJHDevCo).
Para iti grupo, saan laeng a financial investments ti sanikuada, nu diket pagtaengan a mabalin a pagbusbusanda kadagiti tawen ti panagretiro a sitatalna.
Iti baet a bigbigbigenda ti panagtagikua ti BCDA iti Camp John Hay a nakabasar iti desision ti Korte Suprema, nagapela ti grupo para iti panangibabaet ti Presidente tapno matulongan ida a makasubli kadagiti investment-da.
Iti agdama-maur-uary paylaeng ti sungbat manipod iti opisina ni President Ferdinand Marcos Jr.
