Nagballaag ti maysa a manangitandudo iti anti-disinformation nga uray ti simple a panangibinglay iti saan a pudno nga impormasion iti social media ket mabalin a madusa uray no saan a daytoy ti orihinal a nagtaudan ti impormasion.
Nupay kasta, kinuna ni Atty Jam Jacob, legal ken policy advisor ti Foundation for Media Alternatives a kaaduan kadagiti Pilipino a natataengan ket marigatan a mangsukimat ti saan a pudno nga impormasion iti online.
Manipod iti Enero iti agdama a tawen, dumanon iti 86.75 milion ti aktibo nga agar-aramat ti social media platform iti Pilipinas.
Ngem imparang ti survey nga insayangkat ti Social Weather Station idi 2022 nga agarup 51% kadagiti Pilipino ti saan a makalasin iti factual information ken fake news.
Manipod idi Enero a uno agingga Agosto a otso iti agdama a tawen, nakaawat ti PNP Anti-Cybercrime Group ti dandani 3,800 a reklamo maipapan iti fake news wenno saan a pudno nga impormasion.
Ngem sigun iti Philippine National Police, awan ti linteg a mangdusa kadagiti mangiwarwaras ti palso a damag.
Nupay kasta, mabalin a saklawen ti Anti-Cybercrime Law dagiti nasao a kaso babaen ti pannakaipila ti reklamo iti cyberlibel.
Iti sidong ti linteg, dagiti naglabsing iti cyberlibel ket sumango iti agingga iti walo a tawen a pannakaibalud, ken multa iti P40,000 agingga iti P1.5 million.
Kabayatanna, dagiti computer-related identity theft ket mabalin a madusa iti agingga 12 a tawen a pannakaibalud, ken agmulta iti agarup P200,000.
