Binabalaw ti maysa a grupo dagiti babbai dagiti kandidato idiay Urdaneta, Pangasinan seknan iti mapapati nga “kissing auction” nga adda pakainaigan ti maysa a nataengan a babai bayat ti campaign rally.
Iti maysa nga statement, kinuna ti grupo dagiti babbai nga imbabain dagiti incumbent mayor ken vice mayor ti Urdaneta, Pangasinan ti nataengan a babai maipapan iti ‘kissing auction’ a kasukat ti sumagmamano a ribu a pisos.
Kinuna ti nangato nga opisial ti grupo dagiti babbai a narurodda iti nasao a banag a nangisukat iti dignidad ti baket para laeng iti paglinglingayan.
Gapu iti dayta, idagdagadagda iti Commission on Elections a mangisayangkat ti imbestigasion iti nasao nga insidente.
Idi laeng bulan ti Abril, inaprobaran ti Commission on Elections ti supplemental resolution a mangideklara kadagiti amin a lugar ti panagkampania, agraman ti online, kas “safe space” sakbay ti eleksion inton Mayo, 12, 2025.
Babaen ti Commission on Elections Resolution 11127 a pinirmaan dagiti amin a kameng ti Comelec en banc, binaliwanna ti Resolution 11116 ken inkeddengna dagiti election offense a pakairamanan ti panangabuso iti ubing, diskriminasion, incitement, immoral doctrines, obscene publications, exhibitions ken racial discrimination.
