Mapapati a dinandanug dagiti sumagmamano a kameng ti transport group a Manibela ti maysa a kameng ti media bayat ti live reportna iti protesta ti grupo iti igid ti East Avenue sadiay Diliman, Quezon City idi Lunes.
Nangrugi ti tallo nga aldaw a “tigil-pasada” a panagprotesta ti Manibela tapno kiddawen iti gobierno a mapaboran ti kiddaw dagiti saan a nakapag-consolidate a jeepney drivers ken operators iti maysa a tawen a “provisional authority”.
Gapu iti panagprotesta ti nasao a grupo, nangitunda daytoy ti nailet a gunay dagiti tattao ken dandani a saan a mapagnaan dagiti motorista.
Bayat ti panagreport ti journalist, maatap a pinalikmutan dagitoy dagiti miembro ti transport group ken dinanugda ti namindua a daras ti siket daytoy.
Dagos a nakikoordinar daytoy iti Quezon City Police District para iti pannakaipila ti reklamo kontra kadagiti miembro ti MANIBELA.
Ngem iti statement ni Manibela chairperson Mar Valbuena iti social media page, pinaglibakanna ti kinuna ti journalist.
Sigun kenni Valbuena, ti journalist ti nangrurod kadagiti miembroda idi inlunodna dagitoy.
Ngem nupay kasta, nagkiddaw latta ti pammakawan daytoy.
Iti sabali a bangir, inlaksid ti Presidential Task Force on Media Security (PTFoMS) ti pisikal a panang-atake kontra iti journalist.
Kinuna ni PTFoMS Undersecretary Paul Gutierrez a ti pisikal a panangabuso a naaramid journalist ket “saan a makagun-od iti aniaman a suporta ti publiko manipud iti grupo ti transportasion wenno ti isyu nga ikagkagumaanda nga itandudo.”
Kinuna ni Gutierrez a nakikoordinarda iti hepe ti Quezon City District a ni Police Brigadier General Redrico Maranan tapno paayabanda ni Valbuena.
Innayonna a napadasan metlaeng ti journalist ti berbal a panagabuso dagiti kameng ti Manibela.
Kinondenar met daytoy ti sumagmamano a kameng ti media ti nasao nga insidente ken impeksada ti suporta ti journalist.
