Pimmusay ti maysa a kapitan sadiay Abra ken ti maysa pay a kaduana bayat a nadangran ti maysa pay kalpasan a napaltogan dagitoy iti maatap a pannakatambang ni sigud nga Abra Mayor Artemio Donato sadiay Sitio Palicad, Poblacion Pilar, Abra ita nga aldaw.
Nabigbig dagiti pimmusay a da Brgy. Captain Froilan Bueno iti Brgy. Quillat, Langiden, Abra kenni Kevin Bueno bayat a ti nadangran ket ni Sonny Bisares.
Mapapati met nga agarup pito a lugan ti nasao a sigud a mayor ket naggapu sadiay Poblacion, Pilar ken agturong sadiay Villaviciosa, Abra idi napasamak ti nasao nga insidente.
Maibasar iti report, agarup alas 4:40 iti malem idi nakaawat ti Pilar Municipal Police Station iti awag nga adda ti napasamak a shooting incident iti nadakamat a lugar.
Gapu iti dayta, dagus a nagturong dagiti otoridad ken ditoyda a nakita ti maysa a nangisit a Montero SUV nga addaan iti plate number B1 U480 a nakasardeng iti bangir ti kalsada.
Naduktalan nga ti adda iti uneg ti nasao a lugan ket ni Kevin Bisares Bueno, driver, a taga Quillat, Langiden a nagsagrap iti tama ti paltog iti ulona a nangitunda iti ipupusay daytoy.
Kabayatanna, dagiti dua pay a biktima a da Kapitan Bueno ken Bisares no sadino dagus a naitaray dagitoy iti ospital babaen kadagiti responding personnel.
Nupay kasta, pimmusay metlaeng ti kapitan bayat a matamtaming gapu iti nasagrapna a tama ti paltog iti tianna.
Iti baet dayta, agpatpataming metten ni Bisares iti ospital gapu iti pannakapaltog ti sakana.
Kabayatanna, mapapati a dagiti suspek ket adda iti nangato a paset ti kalsada ngem saan pay a nabigbig dagitoy.
