BAGUIO CITY – Nakemmeg ti High Value Individual iti iligal a droga kasaruno ti buybust operation nga impatungpal dagiti otoridad sadiay Military Cut-off.
Nabigbig daytoy a ni Janewen Lui, 42 anyos, naasawaan, maysa a glass ken aluminum installer, tubo ti Sta. Ana Cagayan ken residente ti East Quirino Hill, Baguio City
Maibasar iti report, nangilako ti suspek iti maysa a pakete ti mapapati a shabu nga agdagsen iti 3.1 grams ken aggatad iti P21,080.
Malaksid iti dayta, nakumpiskar ti imetna a kanayunan a pakete ti mapapati a shabu nga agdagsen iti 7.1 grams ken aggatad iti P48,280; maysa a box ti napagango a bulong ti marijuana nga agdagsen iti maysa a kilo ken aggatad iti P120,000; buybust money; cellphone ken lugan a naaramat iti transakyon.
Gapu iti dayta, sumango ti suspek iti kaso a panaglabsing iti RA9165 wenno Comprehensive Dangerous Drugs Act of 2002.
