BAGUIO CITY – kinumpirmar ni Camp Allen Punong Barangay Maribel Estacion ti panakailista ti maysa a kaso ti Hand, Foot and Mouth Disease iti maysa nga agad-adal iti Day Care Center sadiay.
Iti panakiyuman ti Bombo Radyo, kinunana a dagus nga inturong ti maseknan nga ina ti anak daytoy iti pagagasan idi naggurigor ken blister wenno ratunok ti ubing.
Naduktalan iti pagagasan a positibo ti nasao nga ubing iti HFMD isut gapuna a saanen a simrek daytoy iti Day Care Center iti 10 nga aldaw a kas imbalakad ti doktor.
Nupay kasta, indanun kenkuana ti maysa nga ina ti posibilidad a naakaran ti anak daytoy manipud iti immuna nga ubing a nagpositibo iti HFMD iti nasao a center.
Iti agdama, saan pay a nakaala ti kapitana iti update iti ina ti nasao nga ubing nupay dinakamat ti nasao nga ina ti panangipatamingna iti anakna iti pagagasan.
Gapu iti daytoy, imbilinna ti panangibelleng ti maseknan a mannursuro ti Day Care Center sadiay kadagiti ay-ayam dagiti ubbing tapnu saanen a maiyakar ti nasao a sakit kadagiti dadduma nga ubbing nga agad-adal sadiay.
