Impeksa ni Rocky Aliping, Councilor iti siudad ti Baguio a maysa a napintas a damag ti gakat a naisubmitir iti senado nga addaan panggep a mangilaylayon iti serbisyo dagiti barangay officials iti innem a tawen manipud iti tallo a tawen.
Daytoy ket babaen ti Senate Bill 2629 a naisubmitir idi Abril a otso ti agdama a tawen no sadino dagiti barangay officials ket maikkan ti innem a tawen a panagserbisyo ken agingga mamindua a nagsinaruno a tawen a mabalinda nga iggeman ti maysa a posisyon.
Maibasar iti nasao a gakat, naituding nga inton October 2029 ti sumaruno nga eleksyon para kadagiti barangay officials iti pagilian.
Iti panakiuman ti Bombo Radyo kenni Aliping, kinunana a ti termino a naipaay para kadakuada a barangay officials ita a gundaway ket kurang agsipud ta nakkesayan ti naituding a tawen a panagserbisyoda no sadino agarup dua a tawen laeng ti panag-akemda kadagiti posisyonda nga agleppas inton sumaruno a tawen.
Gapu iti dayta, impaganetget ni Aliping nga agbalbalin a karit para kadagitoy a barangay officials no kasanoda a maileppas dagiti proyekto a pangpanggependa nga iyemplementar iti siudad ti Baguio.
Sigun kenni Aliping, ti mapangpanggep a panakaipaay kadagitoy nga innem a tawen a panagserbisyo ket mangipasimudaag iti umdas nga oras tapno adda a mas maipaayda ti pagkasapulan dagiti umili.
Kabayatanna, innayon ni Aliping a rumbeng a saan laeng a ti termino dagitoy ti mailaylayon para iti panakapapintas ti performanceda no di ket rumbeng met ti panakanayon ti pondo ti barangay para kadagiti nagduduma a proyekto dagitoy ken ti panakanayun ti benepisyoda.//Bombo Mera Pacpacan
