Naarestar ti maysa a lalaki nga agtawen iti 50 , construction worker kalpasan a nagpangta ken immuneg nga awanan pammalubos iti residential compund idiay Loakan-Liwanag, Baguio City.
Sigun iti inisyal nga imbestigasuon, adda iti uneg ti pagtaengan ti umuna a complainant idi mapapati nga immuneg ti mapapati a nakainom a suspek iti compound.
Nagbalin nga agresibo ti suspek idi kinompronta daytoy ti complainant gapu iti iyuunegna iti nasao a lugar.
Mapapati met a nagpangta pay daytoy kontra iti complainant ken pinadasna daytoy a dangran.
Dagus met a nag-anawa dagiti kabagyan ken kaaruba ti complainant.
Kalpasan ti sumagmamano a minutos, nagsubli ti suspek iti lugar no sadino nakaiggem daytoyen ti buneng bayat a nagpukpukkaw ken sapsapulenna ti complainant.
Kalpasan iti agarup 10 munitos, adda manen ti napasamak a kapada nga insidente a nakairamanan ti second complainant.
Sigun iti report ti pulisya, nakasakay iti Toyota Hilux ti second complainant, kaduana ti asawana ken dua nga annakda bayat a mapan da koma gumatang iti pangrabian dagitoy, nakitada ti suspek a nakatakder iti tengnga ti dalan a nakaiggem iti buneng.
Nagsardeng ti complainant ken linukatanna ti tawa ti lugan na tapno saludsoden no asino ti sapsapulen ti suspek.
Imbes a sumungbat, mapapati nga inawagan ti suspek iti “duwag” ti complainant ken nangisawang kadagiti saan a nasayaat a sarita.
Mapapati pay a nilayatan ti suspek ti complainant, rason tapno dagus nga inrekepna dagiti tawa ti luganda gapu iti buteng para iti kinatalged ti pamilyana.
Sigun pay ti complainant, nagturong pay ti suspek iti front passenger side iti lugan nga ayan iti asawa na ken intultuloyna a nagpukpukaw.
Bayat nga agturong ti complainant iti presinto tapno ireport ti insidente, nasabatna ti Police Mobile Patrol 8 a mannarimaan nga agpa patrol iti nasao nga area.
Dagos met a nagturong dagiti police personnel iti area ken nagresulta iti pannakakemmeg ti suspek.
Nairutong daytoy iti istasyon ti pulisya para iti umno a dokumentasion, imbestigasyon , ken disposisyon.
Nakasagana metten a maipila ti kaso a grave threat ken tresspassing kontra iti nasao a suspek. // via Bombo Khey Reparip
