BAGUIO CITY – Nakemmeg ti maysa nga indibidual kalpasan iti naipatungpal a search warrant babaen iti sibubukel a pwersa ti Baguio City Police Office iti maysa a pagtaengan sadiay Crescencia Village.
Nabigbig ti suspek a ni Jonee Hayas Tomas, 31-anyos, naasawaan, mekaniko, sigud a drug surrenderee ken residente iti nasao a lugar.
Maibasar iti blotter ti pulisya, nangisyangkat ti kammeng ti Drug Enforcement Unit ti BCPO ken BCPO Station 2 ti search warrant a pinirmaan ni Presiding Judge Bernadette Badecao-Abnasan ti Municipal Trial Court ti Santo Tomas La Union, First Judicial Region.
Naala manipud iti kwarto ti suspek ti uppat a heat sealed transparent plastic sachet a naglaon iti maatap a shabu, maysa a foil ken coin purse.
Maipasidong ti suspek iti drug test ken inquest proceeding para iti manamnama a panakaipila ti kaso kontra kenkuana gapu iti panaglabsingna iti RA 9165.
