Agtultuloy ti imbestigasyon nga ipatpatungpal dagiti otoridad seknan iti maysa a maladaga a nasarakan iti maysa a kasilyas (CR) idiay Asin, Nangalisan, Tuba, Benguet itay nabiit.
Iti pannakiuman ti Bombo Radyo kadagiti otoridad, kinunada a nakaaladan ti kopya ti CCTV footage a makatulong para iti imbestigasyon.
Sigun kadakuada, adda metten ti suspetsa da iti nangaramid ti nasao a krimen.
Maibasar iti report ti pulisya, bayat nga agdaldalus iti kasilyas iti maikatlo a kadsaaran ti babai nga agtawen iti 32, nakitana ti bagi ti maladaga a naiparabaw iti basuraan.
Dagus met nga inawaganna dagiti katrabahuanna ken ti manager rason nga inturongda ti nasao nga ubing iti billiard hall.
Sigun met iti Scene of the Crime Operation wenno SOCO team, pimmusay ti babai a maladaga nga agtayag ti 46 cm.
Naipasidong metten iti autopsy ti bangkay daytoy.
Manarimaanen ti imbestigasyon no sibibiag ti nasao a maladaga sakbay a naabandona daytoy tapno maammuan metlaeng ti kaso a maipila iti suspek.
Sigun iti pulisya, possible a sumango ti ina iti parricide wenno infaticide.
Ti parricide ket panangpatay ti maysa a nagannak iti ubing a naipasngay iti nasurok tallo nga aldaw.
Ti bangkay ti maladaga ket adda ita iti funeral iti siudad ti Baguio.//Bombo Noveh Organo
