BAGUIO CITY – Inlawlawag ni Lailanie Dacquel ti kaipapanan ti panagbalin kas maysa nga aupair sadiay Iceland.
Iti panakiuman ti Bombo Radyo kenkuana, kinunana a ti panagturongna sadiay Iceland ket saan daytoy a mabigbig kas maysa nga Overseas Filipino Workers (OFW) nu di ket kas maysa nga aupair wenno kas paseten ti pamilya.
Sigun kenni Dacquel, ti aupair ket maipapan iti panagtalinaed ti maysa nga indibidual iti maysa a host family a mangibilang kadagitoy kas paset iti pamilya nu sadino addaan dagitoy iti waya-waya ken benepisyo a maiyarig a pudno nga anakda metlaeng dagitoy.
Iti panagbalin daytoy nga aupair, agarup innem a bulan ti napalabas sakbay a nakabirok ti host family-na idiay Iceland.
Kinuna ni Dacquel a maibilang kas maysa a bendisyon ti panagbalin kas maysa nga aupair gapu ta libre ti accomodation ken mairaman met dagitoy kadagiti amin a bakasyon ti nasao a pamilya.
Nupay kasta, kasapulan ti panagbalin a natibker gapu ta kas maysa a pamilya adda met dagiti karit a mapasaran dagitoy.
Inayonna a maysa a karit iti nasao a trabaho ket ti panawen a kasapulan ti maysa nga aupair a pumanaw manipud iti nasao a pamilya gapu iti panagleppas ti kontrata daytoy iti laksid a napaayat kadagitoy.
Kabayatanna, kinuna ni Dacquel a manamnama ti panagleppas ti kontrata daytoy iti agdama a host family ken manamnama nga agakar daytoy iti sabali a host family sadiay Europe.//Bombo Mera Pacpacan
*aupair – a young foreign person, typically a woman, who helps with housework or child care in exchange for room and board.
