--Ads--
BAGUIO CITY- Pimmusay ti maysa a miembro ti Philippine Army kalpasan a naaksidente ti imanmanehona a motorsiklo sadiay Loakan Proper, Baguio City idi kalman ti parbangon.
Nabigbig daytoy a ni Private First Class Mark John Munggao Ayde, 26-anyos, baro, tubo ti Ilocos Sur.
Maibasar iti inisyal nga imbestigasyon, daldalyasaten ti biktima ti kalsada paturong iti PMA Baguio tapno agreport idi aksidente a natnag ti motorsiklo iti waig a nangitunda iti panakaitama ti ulona iti semento.
Nagsagrap ti biktima iti nakaro a dunor partikular iti ulona.
Dagus met a naitaray ti biktima iti Baguio General Hospital babaen iti personnel ti Baguio Emergency Medical Service (EMS).
Nupay kasta, naideklara ti biktima a dead on arrival babaen iti attending physician.
