BAGUIO CITY – Pimmusay ti maysa a nurse kalpasan nga aksidente a natnag manipod iti zip line ti maysa a resort sadiay Kalinga.
Nabigbig daytoy a ni Paul Gaayon, 31 anyos, ken residente ti Purok 5, Bulanao Centro.
Maibasar iti inisyal nga imbistigasyon ti Tabuk City Police Office, aksidente a naigalis ti ima ti biktima manipod iti iggemna a zipline iti maikadwa a gundaway a panaglugan daytoy a nagresulta iti pannakatnagna.
Dagus met a naitaray ti biktima iti Kalinga Provincial Hospital ngem naideklara kas dead on arrival.
Kabayatanna, inlawlawag met ti agtagikua iti nasao a resort a nangipaay ti life guard iti safety instructions iti biktima para kadagiti beginners iti zip line sakbay a naglugan iti daytoy.
Innayunna a natnag pay ti biktima iti safety net ngem gapu iti kinadagsenna ket nadadael daytoy a nangitunda iti pannakatnagna iti daga
Iti agdama, agtultuloy met ti imbistigasyon dagiti otoridad iti nasao nga insidente.
