Kinonbiktar ti Regional Trial Court Branch 2 ni Roman Catholic priest Mark E. Batolne iti tallo a “counts” iti panagrames kontra iti agtawen ti disi sais nga student-scholar ti Diocese of Baguio nu sadinno, nasentensiaan isuna iti reclusion perpetua, wenno duapulo agingga uppat a pulo a tawen a pannakaibalud iti tunggal “count.”
Nagrugi ti sexual assaults idi March 2023 iti maysa a silid nga okupado ti biktima nga student-scholar iti compound ti Diocese of Baguio.
Daytoy ket sigun kenni Attorney Jose Adrian Bonifacio a timmulong iti biktima.
Pormal nga inwaragawag ni Presiding Judge Modesto D. Bahul Jr. ti ruling iti open court idi laeng Huebes, Disiembre 18, ken imbilinna ti agtultuloy a pannakaibalud ni Batolne iti pagbaludan ti siudad ti Baguio.
Ni Batolne ket nagserbi kas finance administrator ti Diocese of Baguio ken general manager ti maysa a radio station, ken ti Montanosa Pastoral Resources Corp., a mangimanmanehar iti maysa a mall iti abay ti simbaan.
Naduktalan ti korte a ni Batolne ket nagbasol wenno ” guilty beyond reasonable doubt” iti sidong ti Articles 266-A ken 266-B iti Revised Penal Code.
Naduktalan iti imbestigasion a dua kadagiti panangrames ket nakaro a naisayangkat gaputa nagaramat daytoy iti igam ken napasamak iti silid nga okupado ti biktimana iti uneg ti maysa a pasdek iti uneg ti Diocesan compound.
Nagtestigo ti biktima a narames daytoy iti innem a daras idi March 2023.
Inladawan met ti Korte a ti testimonia ti biktima ket “credible and consistent” bayat a pinaglibakan ti padi ti akusasion.
Naglemmeng pay ni Batolne kalpasan nga inreport ti biktima ti nasao nga insidente ken simmuko laeng idi June 2024, dandani maysa a tawen kalpasan a nairuar ti warrant of arrest.
Imbilin pay ti korte nga agbayad ni Batolne iti “damages” iti biktima.
Para iti tunggal reklamo, kasapulan nga agbayad daytoy iti ₱75,000 iti civil indemnity, ₱75,000 iti moral damages, ken ₱75,000 iti exemplary damages.
