Nagdangran ti maysa a police officer kalpasan a binagsol ti kapadana a police iti uneg ti Camp Crame sadiay Quezon City idi Enero 13, 2026.
Maibasar iti report ti Criminal Investigation and Detection Group (CIDG), nabigbig ti biktima a ni Police Executive Master Sergeant Eric Castro bayat a suspek ket ni Police Senior Master Sergeant Michael Camillo.
Napasamak ti insidente iti kitchen area ti Anti-Organized Crime Unit (AOCU) bayat ti panagsagana dagiti personnel iti preliminary investigation iti Quezon City Prosecutor’s Office.
Sigun iti testigo, simrek ti biktima a ni Castro iti kusina, sinaruno ti suspek a ni Camillo.
Maatap a nangala ti suspek a ni Camillo iti kitchen knife ken dagusna a dinarup ti biktima a ni Castro.
Pinadas a lapdan daytoy ti biktima babaen iti panangarakupna ngem nangitunda iti pannakabagsolna.
Naiturong ni Castro iti Philippine National Police General Hospital para iti obserbasion gapu iti blood loss.
Kabayatanna, maibasar iti inisial nga inbestigasion, kellat ti panagbaliw ti kababalin ni Camillo sakbay a napasamak ti insidente.
Iti agdama, adda itan iti kustodiya dagiti otoridad ni Camillo bayat nga agtultuloy ti administrative and Criminal investigation.
Sigun kadagiti maseknan a Police officials, manarimaan ti koordinasion dagitoy iti Prosecutor’s Office para iti pannakaipila ti umno a reklamo kontra iti suspek.
Naibilin metteng ti nainget nga imbestigasion, medical ken psychological evaluation para iti suspek.
