BAGUIO CITY – Nakemmeg ti maysa a pulis manipud Cordillera ken ti tallo a kakadwana iti naisayangkat nga entrapment operation sadiay Baseco PCP, Station 5, Manila Police District sadiay Manila idi kanikadua.
Nagresulta ti operasyon iti panakakemmeg ni PCpl Nickson Mina a tubo ti Dugong, Bucay, Abra ken dagiti kakadwana da PCpl Juan Carlo Guzman, PCpl Fransis Mikko Gagarin ken Pat Tom Hikilan.
Dagiti uppat ket miembro ti beat patrol ti Station 5, Manila Police District.
Naaktuwan ti panag-awat dagitoy iti marked money a P200,000 manipud iti complainant a ni Alaysa Panansang.
Nagramot ti operasyon iti inreklamo ni Panansang iti Integrity Monitoring and Enforcement Group ti PNP ti panagkiddaw dagiti uppat a nakemmeg a pulis iti P500,000.
Nupay kasta, imbaba dagiti uppat ti kidkiddawenda iti P200,000 kasukat ti panakawayawaya ti asawa ti complainant a nakemmeg gapu iti iligal a droga.
Narekober kadagiti nakemmeg a pulis ti marked money ken dagiti IDs ken issued firearms dagitoy.
Sumango dagiti uppat iti kaso a panagkikil ken grave misconduct nga agresulta iti panakaikkatda iti serbisyo.
