Agpatpataming ita iti ospital ti maysa a senior citizen kalpasan a nadungpar ti pampasahero a jeep iti intersection idiay Rizal Park Monument, Baguio City ita nga aldaw.
Iti panakiuman ti Bombo Radyo kenni PLT. Boyd Leeson Kis-ing iti Baguio City Police Office Station 7, kinunana a ti pampasahero a jeep ket imanmanehar ti maysa a lalaki nga agtawen iti sangapulo ket siam.
Maibasar iti imbistigasion dagiti otoridad, madama ti panag-cross wenno panagdalyasat ti biktima iti intersection idi nadungpar daytoy ti lugan.
Dagus met a naipaayan iti first aid ti biktima babaen kadagiti nagresponde nga otoridad sakbay a naiturong iti ospital.
Iti agdama, addan iti nasayaat a kasasaad ti biktima bayat a naiturong iti Traffic Enforcement Unit ti Baguio City Police Office ti driver ti nasao a lugan para iti umno a dokumentasion sakbay a maipaima iti korte.//Bombo Genzel
