Pimmusay ti maysa a senior Russian general iti pannakabomba ti kotsena iti siudad ti Balashikha idiay Russia, sigun kadagiti otoridad, kagiddan ti panakipagkita ti special envoy ni US President Donald Trump a ni Steve Witkoff ken ni Russian leader Vladimir Putin idiay Moscow.
Nakipagsarita ni Witkoff iti tallo nga oras kenn Putin, sigun kenni Russian presidential aide Yuri Ushakov babaen ti panangdakamatna a ti napagsaritaanda ket “constructive” ken napateg a maaramat.
Ad-adu ti panangpilit ti Estados Unidos iti Ukraine kalpasan a pinangtaanna idi napan a lawas a mabalin nga umadayo iti saritaan “iti sumagmamano nga aldaw” no nalawag a saan a maragpat ti maysa a katulagan.
Insuhesion gamin ti administrasion ni Trump nga isakripisioda ti Crimea kas teritorio ti Russia, ngem nagkedked ni Ukrainian President Volodymyr Zelensky iti singasing, ken kinunana nga awan ti napateg a pagsaritaan ken ti panagsakripisio ti Crimea kas paset ti Russia ket saan a maitunos iti konstitusion ti Ukraine.
