Pimmusay ni Thai singer Ping Chayada kalpasan a nagsagrap iti septicemia (blood poisoning) a maatap nga adda ti pakainaiganna iti tallo a daras a panagpamasahena iti maysa a massage parlor.
Nagpamasahe ni Ping gapu ta nakarikna daytoy iti shoulder pain.
Kalpasan ti umuna a gundaway a nagpamasahe, imbinglay ti singer a nakarika daytoy iti sakit iti bukot ken tengnged.
Nupay kasta, impagaropna a maysa laeng daytoy a “normal post-massage pain” rason a saanna nga inkabkabeng ken nagturong manen iti massage parlor tapno agpamasahe.
Iti maikadua a gundaway ket impatungpal manen ti kapada metlaeng a masseuse ti neck twisting.
Kalpasan dayta, kimmaro ti sakit a narikna ni Ping iti bagina ngem nagdesisyon latta nga agsubli manen iti kapada nga establishimento.
Nagpamasahe ti singer iti maikatlo a gundaway ngem sabalin ti masseuse a nangasikaso kenkuana nu sadino, inladawanna a “very hard” ti panakamasahe kenkuana.
Nagtultuloy latta a narikna ti singer ti side effects daytoy ngem nagtultuloy latta met a nagtumar kadagiti agas.
Nupay kasta, saan latta daytoy a nataming agingga a naiturong iti pagagasan, nacomatose, ken pimmusay idi laeng December 8, 2024.
Naduktalan met a lisensyado dagiti masahista a nangipaay iti serbisyo kenkuana ngem agtultuloy latta ti imbestigasyon dagiti otoridad.
