BAGUIO CITY-Palpalagipan ti Baguio City Police Office dagiti amin a babbai a liklikanda ti agaramat kadagiti makagargari a kawkawes tapno saan dagitoy a maisagmak.
Mainaig pay laeng daytoy iti pananggandat ti maysa a menor-de-edad a mangrames iti maysa a balasang a nakasuot iti nakiting a short-pant bayat ti pannagna daytoy iti kalsada sadiay Fairview, Baguio City.
Sigun ken ni PCI Eddie Bagto, station commander ti BCPO Station 1, kabayatan ti pannagna ti biktima ket agtetext daytoy iti cellphone-na ken dita a killaat nga inasitgan daytoy ti suspek ken innappot ti suspek ti ngiwat ti biktima.
Nupay kasta, kinuna ni Bagto a nalapdan ti panggep ti suspek idi adda ti motorsiklo a limmabas isut gapuna a dagus a timmaray ti suspek.
Gapu iti daytoy, binalakadan ni Bagto dagiti babbai a liklikanda met laeng ti agaramat iti cellphone kabayatan ti pannagna dagitoy nangruna no awan ti kadua dagitoy.
