BAGUIO CITY – Nauram ti maysa a balay a naaramid iti kayo ken light materials sadiay Happy Homes, Campo Sioco, siudad ti Baguio iti pasado alas-sais ti rabii idi kalman.
Nabigbig ti agtagikua iti nasao a balay a ni Ronald Rodrigues, 45-anyos ken maysa a driver.
Iti inisial nga imbestigasion ti Bureau of Fire Protection (BFP) – Baguio, posible a faulty wiring ti nagtaudan ti uram gaputa nangngeg ti maysa a bumalay ti pinumtok a wire ken idi inlukatna ti silid ket addan iti agas -asok iti uneg.
Awan met ti nadangran manipod kadagiti agnanaed iti nasao a balay malaksid iti maysa nga ubbing a natalimudaw kabayatan ti uram.
Iti agdama ket temporaryo a nagkamang ti apektado a pamilya iti maysa a retreat house iti asideg dagitoy.
Kabayatanna, manarimaan met ti damage assessment nga ipatpatungpal ti BFP tapnu maamuan ti pakabuklan a gatad dagiti nauram ken napukaw iti nasao a balay.
