BAGUIO CITY — Naan-anay a nauram ti maysa a balay bayat a nairaman a nauram bassit ti kaabay daytoy a balay sadiay Purok 5, Pinsao Pilot Barangay, siudad ti Baguio itay agarup alas onse ti agsapa.
Ti balay a totally burned ket maysa a bungalow-type a naaramid iti semento, kayo ken sisim ken daytoy ket tagikua ti pamilya ni Junior Timpac bayat a ti partially burned a balay ket tagikua met ti pamilya ni Rosito Ramon.
Iti panakiyuman ti Bombo Radyo kenni Junior Timpac, kinunana a nakitana ti apona nga agtawen iti uppat a nakaiggem iti nakasindi a kandila ken kalpasan ti sumagmamano a minutos ket ditoy a nakitada a maur-uramen ti pagtaenganda.
Patienna a nagturong ti ubing iti silidda a dua ken sadiay nga adda ti nauram a kawes a nangitunda iti nasao nga uram nangruna ta iti silida ti nakitana a nagtaudan ti asok.
Nupay kasta, nagyaman daytoy gaputa saan a nadangran ti anak ken ti apokona.
Kabayatanna, dakkel met ti panagyaman ti pamilya Ramon gaputa saan a nadangran ti ina ti pagtaengan a maysa nga stroke patient nga adda iti uneg ti pagtaenganda idi napasamak ti uram.
Naamuan a nauram ti pader ken sumagmamano a kagawaan ti nasao a pagtaengan.
Kabayatanna, agtultuloy ti imbestigasyon dagiti otoridad iti nasao nga insidente.
Nagbalin met a karit iti panagrespondeda ti lokasyon dagiti nasao a balay gaputa adayo dagitoy iti kalsada ken adda daytoy iti tapaw ti bantay malaksid pay a nagbalin a lapped ti panagsemento iti kalsada ken drainage canal a paturong iti nasao a lugar
