--Ads--
BAGUIO CITY-Agpapaimbagen ti maysa a gwardiya kalpasan nga aksidente a natamaan iti bala ti paltog ti saka daytoy iti guardhouse ti Lubas National High School sadiay Guitley-Lubas Road, La Trinidad, Benguet idi rabii.
Nabigbig daytoy a ni Lucio Tanacio Aguindang, 58-anyos, naasawaan ken residente ti Lubas, La Trinidad, Benguet.
Maibasar iti report ti pulisya, idaldalimanek ti gwardiya ti lamisaan iti guardhouse kalpasan ti panagpatrolya ken panaginspeksionna iti compound ti nasao a pagadalan idi natnag ti issued firearm daytoy a pistol.
Pimtuk ti nasao a paltog ken aksidente a natamaan ti kanigid a luppo ti nasao a gwardiya.
Dagus daytoy a nagpaarayat iti pulisya ken inturongda daytoy iti pagagasan para iti panakataming daytoy.
