BAGUIO CITY- Nakemmegen ti maysa kadagiti menor de edad a kangrunaan a suspek iti panakapapatay ti maysa a mannalon a naibelleng iti rangkis iti Baguio-Bontoc Road sadiay Km. 39, Halsema Highway, Abiang, Atok, Benguet idi napalabas a lawas.
Immunan a nabigbig ti biktima a ni Geronimo Toyaoan, 26-anyos, mannalon ken residente ti Bucao, Abiang, Atok.
Sigun kenni PCI Ceasar Malong, hepe ti Atok PNP, ti nakemmeg a suspek ket agtawen iti sangapulo ket pito a tubo ken residente met laeng ti Atok, Benguet bayat a ti maysa pay kadagiti maan-anop a suspek agtawen iti sangapulo ket walo ken residente ti La Trinidad, Benguet.
Kinuna ti opisial a maibasar iti affidavit ti nakemmeg a menor de edad ket tinakawanda ti biktima ken inalada ti nasurok P30,000 a kuarta daytoy a naglakuanna iti nateng ken ti cellphone daytoy.
Insalaysay ti suspek a nabartek ti biktima a nagturong iti store a bambantayanna ken nagorder iti noddles agingga a nakaturog iti lamisaan.
Ditoy a nakita ti suspek a dakkel ti iggem a kuarta ti biktima isut gapuna nga inawaganna ti kadwa daytoy manipud sadiay La Trinidad.
Inaklonna met laeng a nagtinulunganda a binagbagsol ken pinangpang-or ti biktima sakbayda a binungon iti tulda ken imbellengda iti rangkis iti nasao a passet ti kalsada.
Kanayunan iti daytoy, im-imbestigaran ti pulisia ti Atok MPS ti mapapati a koneksion ti krimen iti fraternity wenno gang a sigud a nakipasetan ti biktima idi agad-adal pay daytoy sadiay La Trinidad
