Kinemmeg dagiti otoridad ita nga aldaw ti maysa kadagiti kadua nga akusado ni sigud a Senador Ramon Bong Revilla Jr. mainaig iti mapapati a P92.8 million a ghost flood control project idiay Pandi, Bulacan.
Nakemmeg ni Christina Mae del Rosario Pineda, agtawen ti 38, kahera ti Department of Public Works and Highways (DPWH) Bulacan First District Engineering Office idiay Barangay Bangao, Buguias, Benguet.
Babaen kadagiti kameng ti Philippine National Police-Criminal Investigation and Detection Group – Mountain Province Provincial Field Unit ken 1st Provincial Mobile Force Company ti Benguet Police Provincial Office, natiliw ni Pineda iti pasado alas dose iti tengga ti rabii ita nga aldaw.
Itay laeng kallabes, nangipaulog ti Sandiganbayan Third Division iti warrant of arrest ken hold departure order idi kalman kontra kenni Revilla ken innem a dadduma pay, pakairamanan ni Pineda, a sumangsango iti malversation nga adda pakainaiganna iti naanomalyaan a flood control projects idiay Pandi, Bulacan.
Ti arrest warrant ket impaulog ni Associate Justice Karl Miranda ken awan ti piansa a nairekomendar.
Malaksid kenn Revilla ken Pineda, karamana iti arrest warrant ket da sigud a DPWH Bulacan First District Engineering Office (DEO) assistant district engineer Brice Hernandez; sigud a DPWH Bulacan First DEO Engr. Jaypee Mendoza;sigud a DPWH Bulacan First DEO Engr. Arjay Domasig; sigud a DPWH Bulacan First DEO Engr. Emelita Juat; ken sigud a DPWH Bulacan First DEO finance section chief Juanito Mendoza.
