BAGUIO CITY – Agkallaysa kuma inton sumaruno a bulan ti Marso ti maysa kadagiti pulis a pimmusay iti napasamak nga engkwentro dagitoy kontra iti maysa a national high value target sadiay Lubuagan, Kalinga.
Iti panakiuman ti Bombo Radyo iti ina ni PO1 Vincent Paul Tay-od, kinunana a maikallaysa kuma ti anakna inton Marso 22 ngem napapatay daytoy iti nasao nga operasyon.
Kabayatanna, naamuan met a kaaw-awid laeng ti asawa ni PO3 Cruzaldo Lawagan manipud Canada para iti house blessing ti pagtaenganda, dua nga aldaw sakbay ti operasyon.
Nalaus met ti panagladingit ti ina, asawa ken kakaisuna nga anak ni PO1 Charles Compas gapu iti nasapa nga ipupusay daytoy.
Awan met ti madakkelan nga ama ti inaudi nga anak ni PO2 Jovenal Aguinaldo malaksid pay a naulila ti tallo nga annakna a bin-ig nga ubbing paylaeng.
