BAGUIO CITY – Lapped kadi ti disabilidad, edad ken dadduma pay a parikot wenno pakaseknan para iti panagsapul iti disente a trabaho?
Kaaduanna kadatayo ti managreklamo, nu adda ti mapasarantayo nga uray laeng simple a parikot, nu mamingsan ket managpili tayo kadagiti trabaho uray nu kompleto met dagiti paset ti bagi tayo.
Ni Tatay Jose Mun-ayao nga agtawen iti pito pulo ken agnanaed sadiay Puguias, La Trinidad Benguet ket nakapanunot iti disente a trabaho iti baet nga agar-aramat daytoy iti dua a saklay.
Paralisado ti dua a saka ni Tatay Jose kalpasan a na-stroke daytoy sumagmamanon a tawen ti napalabas.
Nupay kasta, imbes nga agpaidalit laeng daytoy, imbes nga agi-idda laengen daytoy ken aguray iti tulong ti sabali, tinulunganna a mismo ti bukodna a bagi kagiddan ti tulong nga impaay kenkuana dagiti naayat nga indibidual.
Ikagkagumaanna ti agmaneho uray nakasaklay daytoy tapno ag-buy and sell kadagiti timba kasta metten nga agmalmalem nga agrikrikos daytoy iti merkado publiko tapno aglako iti scratch it.
Iti panakiuman ti Bombo Radyo kekuana, naammuan nga ikarkarigatanna ti inaldaw nga agsapul iti pagbiagna tapno adda ti igatangna iti uray laeng lugaw nga ipaunegna, ken kinunana a kaaduan iti masapsapulanna ket igatangna iti agas ken maintenance na.
Kinunana a napukaw metten ti panagtalekna kadagiti ahensia ti gobierno gapu ta saanda daytoy nga inandingay kabayatan dagiti kalilideman a panawen ti panagbiagna.
Ti maysa pay a nasakit iti biag ni Tatay Jose, kinunana nga inabandonan daytoy dagiti annakna isut gapuna nga agmaymaysa daytoy nga agbibiag, ken kinunana a dagiti laengen kaarubana ti mangtultulong kenkukana no kumarkaro ti marikriknana.
Iti panagtulid ti panawen, manaynayunan a manaynayunan ti tawen ni Tatay Jose, ken sapay la koma ta mataliaw daytoy dagiti annakna uray pay no ania ti naglabas a parikot dagitoy.
Nupay limitado laeng ti naiystoryana nga impormasion maipapan iti pamiliana, makita kadagiti mata ni Tatay Jose ti liday iti panagmaymaysana gapu ta saanna pay nga ammo no sadinon a paset ti lubong ti ayan dagiti annakna.
Iti kapadasan ti Tatay Jose, naipalagip kadatayo amin a masapul ti agtultuloy a pannakibinnadang ken panangsaranget kadagiti karit ti biag, masapul a datayo a mismo ti mangtulong ti bagi tayo tapno maaddaan tayo ti bukod a pagsapulan tapno saan tayo nga agbalin a padagsen iti sabali a tao.
Sapay la ngarud koma ta agserbi daytoy a pagsarmingan kadagiti napili iti trabaho kasta metten kadagiti tattao a pilpilienda ti agaramid iti maikaniwas iti linteg tapno laeng maaddaanda iti kuarta gapu ta saanda a kayat a pagbannugan ti pagbiagda.
Ni Tatay Jose Mun-ayao nga agtawenen iti 70 ket maysa nga ehemplo kadatayo amin gapu iti tured, determinasion, gaget, kinaibtur ken kinaanus daytoy saan laeng a kadagiti pannubok a mapasmapasaranna no di ket kasta metten iti pagsapulan wenno negosio na ken iti trabahona.
Para iti kanayunan nga impormasion maipapan kenni Tatay Jose, kadagiti mangayat a mangsarungkar kenkuana, silulukat ti Bombo Radyo Baguio a mangipaay iti kanayunan nga impormasion.
