BAGUIO CITY – Pinalagipan manen ti Mankayan Municipal Police Station dagiti pagadalan a salwadanda a naimbag dagiti kagawaan iti uneg dagiti silid-pagadalan.
Kasaruno pay laeng daytoy ti maikatlo nga insidente ti panagtakaw kadagiti pagadalan sadiay Mankayan ita a tawen.
Sigun iti Mankayan PNP, idi kalman ket naduktalan dagiti mannursuro ti Bulalacao Elementary School a sinerrek dagiti agtatakaw ti opisina ti prinsipal ken ti kantina ti pagadalan.
Nakalanad iti report a naduktalan laengen ti mannursuro a ni Maring Tibawen Paydoen a mapukpukaw ti kandado ti opisina ti prinsipal ken mapukpukaw ti maysa a set ti computer ken maysa a monitor.
Dinadael met laeng dagiti agtatakaw ti dua a kandado ti school canteen ken maatap a ginandat pay dagiti suspek a luktan ti computer room ti pagadalan.
Mapattapatta a dumanon iti nasurok P30,000 ti gatad dagiti napukaw a kagawaan iti nasao a pagadalan.
