Imbinglay ni Atty. Lauro Gacayan, legal luminary ken law professor, ti kapanunutanna maipanggep iti umuna nga aldaw ti impeachment trial ni Vice President Sara Duterte a napasamak idi kalman, Hulyo 7.
Iti pannakiuman ti Bombo Radyo kenkuana, kinunana a nasayaat ti pannakaipresentar ni House lead Prosecutor Gerville Luistro kadagiti ebidensiya a mausar a mangsuporta kadagiti uppat nga articles of impeachment, gapu ta naurnos ken naipalawagna ti tunggal pammaneknek a maiparang iti hukoman.
Inlawlawagna met a nalaing nga abogado ni Defense Lead Counsel Shiela Sison ngem ad-ado ti naipresentarna ket panangipalawag iti Konstitusion imbes a direkta a depensa para ken VP Duterte, ta saan a maibilang a legal a depensa ti panangibaga a saan a maikkat iti puestona gapu ta isu ti nakaawat iti adu unay a boto.
Imbinglayna pay a saan nga ibagbaga ti Konstitusion a ti Senate President ti masapul nga agbalin a presiding officer iti impeachment trial malaksid no ti Presidente ti ma-impeach, isu a siasinoman a mapili dagiti senator-judges ket adda karbenganna nga agpreside iti proseso.
Impaganetgetna met a nasayaat nga abogado ti agpreside iti impeachment court tapno maawatna a naimbag dagiti legal a batayan dagiti objections ken ti umno a pannakaikeddeng kadagitoy.
Sigun pay kenkuana, rumbeng laeng ti panangisubli ti kahon iti Bureau of Internal Revenue ta masapul nga agiruar iti subpoena ti impeachment court no kasapulan dagiti tax returns ni VP Sara kas ebidensiya ken kasta met a ti BIR mismo ti mangiparang dagiti dokumento. //BomboKhey
