Nagballakad ni Norman Marquez, maysa nga Animal Rights Advocate iti publiko nu kasbilang adda dagiti matiliwanda wenno makitada a mangab-abuso kadagiti ayop ken panganan a mangidiaydiaya iti karne ti aso.
Iti pannakiuman ti Bombo Radyo kenkuana, impettengna a nadagsen a pananglabsing iti Animal Welfare Act ti panangpapatay ti aso ken pusa.
Sigun kenkuana, nu adda dagiti makitada a mangparparti iti aso, nasayaat nga ivideoda a makita nga aso ti maparparti wenno mabalinda a dagos nga agayab iti pulis tapno dagos nga arestarenda ti suspek.
Inlawlawagna nga apaman a maaktuan ti suspek a mangparparti iti aso, mabalinen daytoy a maarestar ken mapilaan iti kaso.
Kabayatanna, inlawlawagna a karit kadakuada dagiti a mangidiaydiaya iti karne ti aso gapu ta awan ti nabatad nga ebidensya a makita ti mata.
Nupay kasta, inbalakadna a nu kasbilang ada dagiti mangidiaydiaya iti mapapati a karne ti aso, nasaysayaat a mangala iti video iti restaurant ken panangorder iti nasao a potahe tapno ma-establish ti nagapuanna ti sample.
Kalpasanna, mabalin nga agturong iti National Meat Inspection Service (NMIS) tapno ipa-test ti nasao a karne.
Apaman a maawat ti sertipikasyon a karne ti aso ti sample, mabalinen a mangipila iti kaso iti City Prosecutors’ Office wenno Provincial Prosecutors Office.
Inlawlawagna a saanen a kasapulan a dumalan iti barangay ti nasao a kaso gapu ta lampas-P5,000 ti penalty na ti asinoman a manglabsing iti Animal Welfare Act.
Kanayonanna, impettengna a nadagdagsen met ti maipataw a pannusa nangnangruna nu ti nanglabsing ket maysa a government employee. //bombokaren.c.sapirao