Pimmusay ti maysa a lalaki nga Australian nga agtawen ti 50 kalpasan a kinnagat ti Australian bat lyssavirus (ABLV) — manmano a rabies-like virus, sigun iti report dagiti opisial ti New South Wales (NSW).
Dagos a kritikal ti kasasaad ti lalaki idi nakagat sakbay a pimmusay daytoy.
Kinumpirmar ti NSW Health nga awan pay ti epektibo nga agas iti nasao a virus, nga immuna a natakuatan idi 1996 ken tallo laeng ti nakumpirmar a kaso ti tao a naipadamag iti sangalubongan — amin dagitoy ket nagresulta iti ipupusay.
Naammuan a ti ABLV ket maiyakar nu sumrek ti katay ti panniki iti bagi ti tao babaen ti kagat dagitoy.
Mabalin a maimatangan ti sintomas kalpasan ti sumagmamano nga aldaw wenno tawen a kas ti panaggurigor, panagsakit ti ulo, ken panagkapuy, a posible a mangitunda iti paralysis, delirium, kombulsyon, ken agresulta iti ipupusay.
Nagballaag ti NSW Health iti publiko a liklikan nga iggaman wenno asitgan dagiti panniki gaputa aniaman a kita ti panniki idiay Australia ket posible nga addaan ti ABLV.
Imbalakad dagiti eksperto a nu makagat ti panniki, dagos a bugwan ti sugat iti uneg ti 15 minuto usar ti sabon ken sabot, ken agaramat ti antiseptic.
Kasapulan metlaeng ti agpaagas usar ti rabies immunoglobulin ken rabies vaccine.