Irekreklamo ita ti maysa nga indibidual ti maysa a travel agency partikular ti “Philippines Travel and Tours promo ticketing” gapu ta patienna a na-scam daytoy.
Sigun kenni Alyas Mike, nakitana iti facebook ti “Philippines Travel and Tours promo ticketing” a mangidiadiaya iti nagduduma a serbisyo.
Nag-avail ngarud daytoy iti serbisyo ti nasao a travel agency ken nagbayad daytoy babaen iti Gcash idi January 17, 2025.
Nupay kasta, agingga ita ket awan paylaeng ti inpaay ti nasao a travel agency nga itinerary ticket kenkuana.
Sigun kenni Mike, planona nga agtravel manipud Davao paturong idiay Metro Manila ken Manila paturong iti siudad ti Baguio inton Marso a kinse.
Innayonna nga imbaga ti travel agency kenkuana a naka-promo dagitoy isunga nababa laeng ti binayadanna.
Dinakamat ni Mike a tawtawaganna ti cellphone number a nangipatulodanna iti bayad ngem saanen a makontak ken inblock pay ti nasao a travel agency isuna iti messenger.
Kabayatanna, kinontak met ti Bombo Radyo ti “Philippines Travel and Tours promo ticketing” babaen iti social media tapno maala ti benneg dagitoy.
Sigun iti nasao a travel agency, adda ti opisinada iti maysa a mall iti siudad ti Baguio ngem idi napan ti Bombo News Team ket awan ti mabirukan.
Saan metten a sinungsungbatan ti nasao a travel agency dagiti simmaruno a mensahe nga impatulod ti Bombo News Team kenkuana.
Kasaruno iti daytoy, nagpalagip met ti Baguio City Cyber Response Team iti publiko nga agturongda iti kaasitgan nga istasyon ti pulisya nu makapadasda iti kapada nga insidente.
Sigun kenni PMaj. Annie Carmel Comising, Team Leader ti Baguio City Cyber Response Team, nasayasayaat a maireport daytoy tapnu maamuan a nasayaat ti kinapudno seknan ti nasao a kaso agsipudta adda dagiti trained investigators kadagiti sangapulo nga istasyon ti Baguio City Police Office a nakasagana a tumulong.//Bombo Genzel Depayso
