BAGUIO CITY- Agpatpataming iti pagagasan ti maysa nga indibidual kalpasan a nadangran iti pannakatnag ti lugan daytoy iti agarup 50-Metro ti kaunegna a rangkis sadiay Sitio At-ato, Bontoc ili, Bontoc, Mountain Province agarup alas tres ti parbangun ti Abril 17.
Nabigbig ti biktima a ni Clarence Amogan Caballero, 35 -anyos, naasawaan a residente ti Central Balili, La Trinidad, Benguet a driver ti maysa a pickup nga lugan.
Iti inisyal nga imbestigasyon, nagtuad ti driver wenno biktima sadiay La Trinidad nu sadinno kabayatan ti panagdalyasatna iti kalsada sadiay Barlig, Mt. Province, napukawan daytoy ti kontrol iti luganna kabayatan ti panag-overtakena iti maysa a van ken nangitunda iti pannakatnag iti rangkis.
Dagus a naipaayan met daytoy iti medical attention iti napasamakan ti insidente agingga a naiturong iti Bontoc General Hospital.
Agtultuloy ita ti panakatamingna iti pannakasagrapna iti dunor.
Gapu iti daytoy, agpalpalagip manen ti Bontoc MDRRMC kadagiti motorista iti panagridam ken panagannad kabayatan ti panag-maneho dagitoy.
