PARACELIS, MT PROVINCE – Pimmusay ti maysa nga indibidual kalpasan a nalmes iti Siffu River idiay Bayongyong, Barangay Bananao, Paracelis, Mountain Province ita nga aldaw.
Maibasar iti report ti Paracelis Municipal Police Station, napan ti biktima ken ti kadwana iti nasao a karayan tapno pamagaen ti bukel ti mais ngem aksidente a nalmes daytoy.
Dagus met a nagdawat ti tulong ti kadwada ti biktima.
Impatungpal met ti pulis ti cardiopulmonary resuscitation (CPR) iti nalmes a biktima.
Naitaray metlaeng ti biktima iti ospital ngem naideklara a pimmusayen.
Sigun met iti maseknan a pamilya, ti biktima ket addaan ti heart failure ken madama ti medikasyonna.
Patien dagitoy a nagsagaba ti biktima ti heart attack bayat ti kaaddada iti karayan.
Nakumpirmar met iti medico-legal examination a ti ipupusay ti biktima ket gapu iti asphyxia secondary to drowning.
