Pimmusay ti maysa nga indibidual kalpasan a natnag iti flyover nga asideg iti Baguio General Hospital and Medical Center, pasado ala una itay parbangon.
Saan met a dinakamat dagiti investigators ti nagan ti biktima gapu ta sigun kadakuada ket saanda nga otorisado a mangipaay iti daytoy.
Maibasar iti naala a CCTV footage, manarimaan nga agdaldalyasat ti white L300 van a kukua ti maysa a telecommunication company iti flyover.
Bayat nga agdaldalyasat daytoy, naisadsad ti makinkanawan a paset ti lugan nga isu ti maatap a rason iti pannakatnag ti biktima.
Maibasar iti report ti pulisya, napasamak ti insidente iti pasado ala una ti parbangon ita nga aldaw.
Iti panakiuman tayo kadagiti sumagmamano a witness, immuna a nakitada nga adda ti natnag nga streetlight manipud iti flyover ngem saan dagitoy a nakita ti natnag a bagi ti biktima.
Kalpasan ti sumagmamano a minutos ket nakita dagiti riders nga agdaldalyasat iti sirok ti flyover ti bagi ti biktima.
Dagus a nagturong ti maysa a witness iti BCPO station 5 tapno agkiddaw iti tulong.
Kalpasan dayta, nakunana a sinurotna ti nasao a lugan ngem nakitana laeng daytoy a naabonda sadiay batog ti University of the Philippines Drive.
Gapu iti dayta, manarimaan ti panangbirok dagiti otoridad iti drayber iti involved a lugan.//Bombo Genzel Depayso
