BAGUIO CITY- Pimmusay ti maysa nga indibidual bayat a nadangran ti dua a daduma pay iti Vehicular Traffic Accident a napasamak sadiay Sitio Ubbog, Puguin, Conner, Apayao idi kalman, Abril 30.
Nabigbig ti pimmusay a ni Saturnino Gumaboy Baluyan, 59-anyos, pasahero bayat a dagiti nadangran ket da Dennis-Bumunos Lumiwan, 54-anyos, driver ken ni Tyrelle Cabnaag Lumiwan, 12-anyos, bin-ig a residente ti Mabiga, Conner, Apayao.
Maibasar iti imbestigasion, daldalyasaten ti puraw a Mitsubishi Delica nga addaan ti plate number RAW 101 ti kalsada sadiay Sitio Ubbog, Barangay Puguin idi naawanan ti preno ti lugan a nangitunda iti panakaidungpar daytoy iti igid ti kalsada.
Dagus a naiturong dagiti biktima iti Conner District Hospital babaen kadagiti nagresponde a barangay officials.
Nupay kasta, naideklara a pimmusay ni Saturnino babaen iti attending physician.
Dukduktalen met ita dagiti otoridad ti danyos iti nasao nga insidente.
