Pinaglibakan ti maysa nga opisial ti Palawan ti alegasion ti gobierno ti China a dagiti tallo a Pilipino a natiliw ket espia.
Kinunana a sigud nga scholar dagitoy a kayatda laeng a tulongan ti pamiliada ken agadal iti ballasiw-taaw.
Dagiti tallo a Pilipino—dua a lalaki ken maysa a babai— ket sigud nga skolar ti Hainan Normal University iti sidong ti katulagan kasaruno ti “sisterhoodZ” iti nagbaetan ti Palawan ken Hainan, China.
Dagiti benepisiario iti scholarship grant ket maipapaayan ti libre a pagturugan, binnulan nga “allowance,” “comprehensive medical insurances,” ken maysa a round-trip ticket manipod Palawan agingga Haikou, sigun iti Philippine News Agency idi tawen 2018.
Inkonsidera ti opisial ti Palawan a dagitoy ket retaliatory moves wenno mainaig iti riri ti Pilipinas iti China maipapan iti West Philippine Sea.
Maipalagip a tiniliw dagiti otoridad ti Pilipinas ti agarup sangapulo ket dua a Chinese nationals iti napalabas a tallo a bulan gapu iti mapapati a panagespiada, ken naakusaran dagitoy iti panangalada iti iligal ken sensitibo nga impormasion maipapan kadagiti military camps ken critical infrastructure a mabalin a mangdadael iti nasional a seguridad ken depensa ti Pilipinas.
