Pimmusay ti 65-anyos a lalaki bayat a nadangran dagiti 16 a dadduma pay kalpasan a natnag ti naglugananda a private utility vehicle iti 30-metro ti kaunegna a rangkis idiay Barangay Dangoy, Lubuagan, Kalinga, 4:00pm idi Marso 31, 2026.
Maibasar iti report ti Lubuagan Municipal Information Office, napukawan iti preno ti PUV nga imanmaneho ni Arcadio Accoy iti natarik a paset ti kalsada.
Sigun pay iti inisyal a report ti Municipal Disaster Risk Reduction and Management Office (MDRRMO) ken Lubuagan Municipal Police Station (MPS), immatras pay ti lugan sakbay a natnag iti rangkis.
Dagiti 17 a pasahero ket bukbuklen ti innem nga ubbing, 4-anyos ti kaubingan ken 11 nga adults, 85-anyos ti kataengan nu sadino nagsagrap amin dagitoy iti dunor iti nagduduma a paset ti bagida.
Naitaray a dagus dagitoy iti ospital para iti initial treatment. Nupay kasta, ita laeng nga aldaw ket naideklara a pimmusay ti 65-anyos a ni Julio Agaton gapu iti nasagrap a dunor iti ulona ken iti dadduma pay a paset ti bagina.
Nakaruar metten iti ospital dagiti dua nga indibidwal pakairamanan ti 85-anyos a lalaki.
Agtaltalinaed met a maob-obserbaran ti lima a pasyente iti Kalinga District Hospital, maysa ti nairefer iti ospital idiay Apayao, bayat a nairefer metten dagiti dadduma pay iti Kalinga Provincial Hospital.
Kabayatanna, impeksa met ni Mayor Joel Tagaotao ti pannagyamanna kadagiti rescue teams ken civilian volunteers iti dagus a panagresponde dagitoy iti nasao nga insidente.
