BAGUIO CITY – Pimmusay ti maysa a lalaki kalpasan a nagkettel iti bukodna a biag babaen ti panangibitinna iti bagina idi parbangon ti Hunyo 3 sadiay Zone 5, Bangued Abra.
Naduktalan iti imbestigasyon ti pulisya nga inbitin ti biktima ti bagina idi agarip 12:45AM ti Hunyo 3.
Dua met kadagiti board mate ti biktima ti nangiyuman iti Bangued MPS iti nasao nga insidente nu sadinno kinunada a napasamak ti insidente iti kusina ti boarding house dagitoy.
Naamoan nga idi 11:45PM ti Hunyo 2, nagkiddaw ti biktima ti ballpen kadagiti board mate-na ngem saanda nga inkankano gaputa nakainom daytoy ti arak.
Kalpasan ti sumagmamano nga minutos, paturong koma iti comfort room ti maysa kadagiti boardmate-na ngem naklaat idi nakitana ti biktima a nakabitin iti kusina.
Dagus a nagresponde ti Bangued MPS ken naiturongda pay ti biktima iti ospital ngem naideklara nga dead on arrival.
Maibasar pay iti imbestigasyon, rumrumuar a panagimon wenno selos ti maatap a rason ti nasao nga pasamak gapu iti surat nga imbati ti biktima iti kuartoda.
