--Ads--

BAGUIO CITY-Agtultuloy ti hot pursuit operation ti militar kontra kadagiti nakarinnupakda a kameng ti rebelde a New People’s Army idi agsapa kalman sadiay Pinukpuk, Kalinga.
Sigun kenni Lieutenant Colonel Gulliver Seneres, commanding officer ti 50th Infantry Batallion ti Philippine Army, manarimaan ti panagpatrolya dagiti soldado sadiay Sitio Anyang, Barangay Wagud, Pinukpuk, Kalinga idi adda nakitada nga anniniwan ti tao a nakaiggem ti paltog.
Kinunana nga iti panangsukimatda ket nangitunda daytoy iti panakirinnupakda kadagiti pito a kameng ti NPA a nagpaut ti sangapulo a minutos.
Narekoberda ti maysa a caliber 30 nga US carbine, dua a magazine ken uppat a pidaso ti improvised explosive device (IED).
Awan met ti nailista a nadangran iti benneg ti tropa ti gobyerno bayat a manarimaan ti panangbigbigda kadagiti nakarinnupak dagitoy ken ti panangberipikarda no adda dagiti nadangran kadagiti rebelde gaputa adda ti nakitada a tedted ti dara iti nakapasamakan ti rinnupak.
Agtultuloy pay ti panakitaripnongda kadagiti residente sadiay Kalinga para iti panakibinnadang dagitoy iti militar para iti panakabigbig dagiti NPA.
Kabayatanna, agtultuloy met ti rinnupak iti nagbaetan ti tropa ti gobyerno ken dagiti nasurok 20 a rebelde a New People’s Army sadiay Barangay Balatoc, Pasil, Kalinga.
Nangitunda daytoy iti panakadangran ti maysa a soldado a nabigbig a ni Sgt. Joselito Felipe.
Nagturong metten iti nasao a lugar dagiti dadduma a soldado kas reinforcement.