BAGUIO CITY — nahold-up ti maysa a taxi driver iti deppaar ti Ambiong Road, Ambiong, La Trinidad, Benguet idi rabii.
Nabigbig daytoy a ni Restituto Valencia Bautista, 52-anyos, naasawaan, driver/operator ti taxi nga addaan plaka nga AYS 212 ken residnete ti Busol Watershed, Aurora Hill, Baguio City bayat a dagiti suspek ket tallo a saan pay a nabigbig a lallaki a pasahero daytoy.
Iti panakipatang dagiti pulis iti biktima, naamuan nga inluganna dagiti suspek sadiay Magsaysay, siudad ti Baguio ken dagitoy ket mapapati a nabartek
Maysa kadagiti suspek ti nagtugaw iti sango bayat a daigti dua ket iti likod ken nagpatulod dagitoy sadiay Beckel, La Trinidad.
Nupay kasta, idi nakadanundan iti junction ti Beckel-Lamut-Shilan Road, maysa kadagiti suspek ti nangibaga nga ipasalog ti biktima ti taxi paturong sadiay Ambiong, La Trinidad.
Idi nakadanunda iti nakapasamakan ti insidente, maysa kadagiti suspek a nakatugaw iti likod ti nangbekkel iti biktima ken nangibaga nga ited ti biktima ti amin a koleksion daytoy bayat nga ingeman ti suspek nga adda iti sango ti kanawan nga ima ti biktima.
Gapu iti buteng ti biktima, intedna ti koleksionna a P2,800 kadagiti suspek sakbay dagitoy a naglibas.
Kinuna ti biktima a saanna a mabigbig dagiti suspek gaputa nagkedked dagitoy a mangilukat iti silaw iti uneg ti taxi
Nangipatungpal dagiti pulis iti pursuit operation para iti panakakemmeg kuma dagiti suspek ngem nagnegatibo daytoy.
