BAGUIO CITY – Saan a natuloy ti mediation iti kaso nga impila ti pamilya Tabdi kontra iti napa-ikkat a PNP Chief a ni Allan Purisima iti Regional Trial Court – Branch 62, La Trinidad, Benguet idi agsapa ti Biyernes.
Mainaig daytoy iti civil case nga impila ni Lhea Tabdi nga asawa daydi PCI Gednat Tabdi ken dagiti nagannak ti banuar a pulis a da Edna ken Garcia Tabdi Jr. a mangkidkiddaw iti pakabuklan a P11,368,500 a compensatory damages.
Agserserbi a respondents ti kaso da Alan Purisima, sigud a SAF chief Director Getulio Napeñas, ken tallo a heneral ti Philippine Army.
Nailanad iti kaso a ti nasao a gatad ti mapapati nga income daydi Tabdi no saan daytoy a napapatay iti Mamasapano operation.
Maipatungpal kuma ti mediation iti Philippine Mediation Council ti Benguet Provincial Capitol idi agsapa ngem awan kadagiti naimbitaran ti dimmar-ay.
Sigun met kenni Mrs. Edna Tabdi, awan ti naawatda a paka-amo mainaig iti nasao a mediation isut gapuna a saanda a nakadar-ay.
Nupay kasta, kinunana nga urayenda laengen ti resulta dagiti kaso a naipila kontra kadagiti nasao opisyal iti Office of the Ombudsman.
Innayonna nga awan ti panggepda a mangisanod iti kaso a naipila iti RTC-Branch 62 tapnu maitipon iti dadduma a kaso a naipila iti Ombudsman.
Kabayatanna, inton Hunyo ket makipatangda kenni Presidente Duterte para iti panakapirma ti scholarship program para kadagiti annak dagiti pimmusay a PNP-SAF 44.
