BAGUIO CITY- Panggep ti lokal a gobierno ti Baguio City a mangkiddaw iti Department of Public Works and Highways iti pannakaidonar dagiti medical beds manipod kadagiti naipaserra a COVID19 Isolation Facilities.
Sigun ken City Health Services Office Head Dra. Rowena Galpo, tarigagayda nga ibunong dagiti nasurok 500 a medical beds kadagiti parapubliko a pagadalan a nangrugin a mangipatungpal iti Face to Face classes.
Kinunana a maysa kadagiti nasken a maikalikagum para iti panagsubli iti face-to-face learning iti panakaimuntar ti isolation facility iti uneg ti school campus.
Dinakamatna a dagus a maipabulod dagiti kama kadagiti pagadalan iti kanito a patgan ti DPWH ti kiddaw ti city government
Nupay kasta, maisubli metlaeng dagitoy iti kanito a masapol manen kaspangarigan adda iti panagngato ti kaso tapno maaramat kadagiti isolation units ti LGU.
Malaksid kadagiti pagadalan, maipaay pay dagiti dadduma a kama kadagiti agkasapulan a District Health Center.
Inlawlawag ni Galpo a paset iti “winding-up” ti lokal a gobierno ti nasao nga addang para iti panagresponde iti COVID-19 Pandemic gapu iti agtultuloy a panagbaba iti inaldaw a kaso ditoy siudad
Maibasar iti nagbalin a katulagan ti lokal a gobierno ti syudad ken DPWH, maisubli iti nasao a departamento ti gobierno dagiti nagatang a medical beds iti kanito a maisardeng ti operasyon pasilidad wenno option ti lokal a gobierno a kiddawen dagitoy babaen iti donasyon.
