BAGUIO CITY – Saanen a kasapulan ti Medical Clearance para kadagiti indibidual nga agturung kadagiti naduma-duma a munisipyo ti Benguet.
Iti interview ti Bombo Radyo Baguio, kinuna ni La Trinidad Mayor Romeo Salda a napagnunumuan dagiti mayors iti Benguet ken Provincial IATF a maisubli laengen ti health declaration form a maiparang kadagiti borders iti probinsia.
Nupay kasta, kinunana a kasapulan latta ti medical clearance ken valid ID nga iparang para kadagiti sumrek iti Baguio City.
Kinunana a ti desisyon ket epekto iti napasaran a parikut iti trapiko wenno atiddog a pila dagiti lugan idi kalman kagiddan ti umuna nga aldaw a panakaikalikagum ti medical clearance nga iparang dagiti nagtaud sadiay La Trinidad a sumrek iti Baguio City.
Dinakamatna a nagsurat ni Benguet Governor Melchor Diclas kenni Baguio City Mayor Benjamin Magalong seknan iti nasao a banag.
Imbinglayna a nailanad iti surat ti panangkiddaw ni Gov. Diclas iti panangiparang laengen ti employee ID para kadagiti sumrek iti syudad nangruna kadagiti APOR ken dagiti agtatrabaho iti Baguio.
Iti agdama, ur-urayenda paylaeng ti sungbat ni Mayor Magalong seknan iti daytoy. (-Brigit Marcasi)